خسته یم یورقونام جاننان بئزمیشم
شهرتدن بئزمیشم، شاننان بئزمیشم
سوزآچیب فانیدن فنادن دئمه
فانیدن بئزمیشم، فاننان بئزمیشم
بیرعومور یانچی تک یاننان باخمیشام
هی یاتیب هی دوروب، هاننان باخمیشام
هرزاددان ال چَکَن خسته لر کیمی
یانچیدان بئزمیشم، یاننان بئزمیشم
بوشلادیم سولطانی بوشلادیم خانی
بوشلادیم دونیادا خان وئرن نانی
بوتپرس خسته اولوب، بوتدان بئزن تک
سولطاننان بئزمیشم خاننان بئزمیشم
زاهدلر دین ساتیر بیرتیکه نانا
یالواریر نان اوچون نااهل انسانا
شعریمده گلیبدی قوی دئییم گوزل
ریادن بئزمیشم ناننان بئزمیشم
زاهدین سوزلرین افسانه گوردوم
حالیمدا احوالین بیگانه گوردوم
دن سَپیر آللادا بیلمییر کی من
تله دن دانه دن داننان بئزمیشم
منصور تک حق دئیب چکیلسم دارا
آللاهی یادائدیب یالوار رام یارا
اناالحق ذکرائدیب سویلَرَم کی من
جسمیمده قیرمیزی قاننان بئزمیشم
رحم ائله رحمیده رحمتدن دانیش
وحییده وحی اولان وحدتدن دانیش
وحدتده عدددن ساننان سوز دئمه
کثرتدن عدد دن ساننان بئزمیشم
مکاندا کوون اوچون مکان خلق اولوب
مکانیم یئرتاپیب زمان خلق اولوب
مکانسیز زمانسیز لامکاندا من
مکاننان اَل چکیب کاننان بئزمیشم
درویشم درویشی تکفیر اِیلمه
تئز گئدیب سوزلرین تفسیر ایلمه
مان ائدمه قوی اوزوم تفسیرین دِئییم
تکفیردن بُهتاننان ماننان بئزمیشم